شاخ نازک تو اک بہانہ تھا

 شاخِ نازک تو اک بہانہ تھا

بس توکل پہ آشیانہ تھا

زندگی مختصر تو کر لیتے

پر ہمیں صبر آزمانا تھا

یا تو پھر ریت پر نہیں لکھتے

یا ہوا سے مجھے بچانا تھا

کوئی میرے قریب کیا ہوتا

میں نے خود سے بھی دور جانا تھا

ایک بارِ حیات اور اس پر

عشق کا بوجھ بھی اٹھانا تھا

ہر نیا زخم سہہ گئے یوں بھی

درد سے واسطہ پرانا تھا

تھی کہیں پر دلوں کے بیچ انا

اور کہیں درمیاں زمانہ تھا

ہر عبادت یہاں پہ خالص تھی

جب تلک رقص والہانہ تھا

اور بھی انتظار کرتے ہم

پر یہاں جتنا آب و دانہ تھا

اسد رحمان