کوئی خدشہ ہے نہ طوفان بلا کچھ بھی نہیں

 کوئی خدشہ ہے نہ طوفان بلا کچھ بھی نہیں

اب نہ غمزہ ہے نہ انداز و ادا کچھ بھی نہیں

عشق کہتے ہیں کسے حسن ہے کیا کچھ بھی نہیں

میری آنکھیں تری صورت کے سوا کچھ بھی نہیں

کب سے ویران پڑی ہے مرے دل کی دنیا

کوئی نغمہ کسی پائل کی صدا کچھ بھی نہیں

زہر سے کم نہیں یہ ساغر مے میرے لیے

تو نہیں ہے تو یہ موسم یہ فضا کچھ بھی نہیں

تیرے چہرے پہ قیامت ہے حیا کی سرخی

رنگ گل رنگ شفق رنگ حنا کچھ بھی نہیں

بختیار ضیا