لو پکڑ سکتے نہیں ہاتھ جلا بیٹھتے ہیں

 لُو پکڑ سکتے نہیں ہاتھ جلا بیٹھتے ہیں

اور پیشانی پہ پھر داغ سجا بیٹھتے ہیں

مجھ کو اپنے ہی قبیلے کا سمجھ کر اکثر

کچھ پرندے مِری دیوار پہ آ بیٹھتے ہیں

رات سُنسان ہے اور ایک ہی ہوٹل ہے کھُلا

رات کٹتی نہیں، کچھ دیر کو آ، بیٹھتے ہیں

میں پکھی واس ہوں، کل ڈیرہ اُٹھا لوں گا سو اب

آ، مِری جان، کوئی اپنی سُنا، بیٹھتے ہیں

اک پچھل پائی کو سوئے ہوئے دیکھا ہے وہاں

ہم کہ جس پیڑ کی چھاؤں میں سدا بیٹھتے ہیں

ریاض ساغر