غم زندگی کے غبار کو کہیں آسرا نہیں مل سکا

 غمِ زندگی کے غبار کو کہیں آسرا نہیں مِل سکا

تِرے بعد تجھ سا جہان میں کوئی دوسرا نہیں مل سکا

مِری آنکھ جس کے خمار میں کئی منزلوں سے گزر گئی

مِری چاہتوں کی جبین کو وہی نقشِ پا نہیں مل سکا

تِرے درد سے جو بھرا نہ ہو تِری یاد میں جو فنا نہ ہو

مجھے اپنے آپ سے بھاگنے کا وہ راستہ نہیں مل سکا

مجھے زندگی سے محبتوں کی سزا میں قتل کیا گیا

مِرا زندگی کے وجود سے کوئی واسطہ نہیں مل سکا

سنو، ایک ساعتِ زرد میں مرے سارے خواب بکھر گئے

مجھے عمر بھر کی ریاضتوں کا بھی کچھ صِلہ نہیں مل سکا

دائم بٹ