دھڑکا تھا دل کہ پیار کا موسم گزر گیا

 دھڑکا تھا دل کہ پیار کا موسم گُزر گیا

ہم ڈُوبنے چلے تھے کہ دریا اُتر گیا

خوابوں کی وہ متاعِ گراں کس نے چھین لی

کیا جانیے وہ نیند کا عالم کدھر گیا

تم سے بھی جب نشاط کا اک پَل نہ مل سکا

میں کاسۂ سوال لیے در بدر گیا

بھُولے سے کل جو آئینہ دیکھا تو ذہن میں

اک مُنہدم مکان کا نقشہ اُتر گیا

تیز آندھیوں میں پاؤں زمیں پر نہ ٹِک سکے

آخر کو میں غُبار کی صُورت بکھر گیا

گہرا سکوت، رات کی تنہائیاں، کھنڈر

ایسے میں اپنے آپ کو دیکھا تو ڈر گیا

کہتا کسی سے کیا کہ کہاں گھُومتا پھِرا

سب لوگ سو گئے تو میں چُپکے سے گھر گیا

نشتر خانقاہی