خیال یار کی خوشبو حیات کی ضامن
مِرے ادب کا خلاصہ نکات کی ضامن
شبِ فراق جگائے گی زلزلے لیکن
نگاہِ شہرِ غزالاں ثبات کی ضامن
غموں کی دھوپ برسنے سے کچھ نہیں ہو گا
مِرے وجود کی ہلچل صفات کی ضامن
اندھیری رات کا شکوہ بجا سہی لیکن
پگھلتی صبح کی سرخی نجات کی ضامن
بتوں کو توڑ کے کعبہ کو کر دیا آزاد
دلوں کی سنگ تراشی، منات کی ضامن
شرابِ کہنہ سے مسعود کچھ نہیں ہو گا
نئے بدن کی لگاوٹ ثبات کی ضامن
مسعود جعفری
No comments:
Post a Comment