اس ترک تعلق کا عجب مجھ پر اثر تھا

 اس ترک تعلق کا عجب مجھ پر اثر تھا

خود ہی وہ جلا ڈالا جو یادوں کا شجر تھا

صحرا میں گلابوں کو اُگانے کی تمنا

یہ خواب انوکھا سا مِرے پیش نظر تھا

وہ لوٹ کے اک دن جو پشیماں چلا آیا

میرے ہی وہ جذبوں کی صداقت کا سحر تھا

وہ میری وریدوں میں بھی موجود رہا ہے

میں کیسے بھلا دیتی نہیں اس سے مفر تھا

باقی رہا کانٹوں میں لہو ہونے کے با وصف

خودداری کا احساس مِرا کیسا نڈر تھا

لائق ہی نہ تھا کوئی مکیں دل میں جو رہتا

ورنہ یہ کشادہ تو بہت رہنے کو گھر تھا

جن کرچیوں سے میرا بدن آج لہو ہے

وہ ٹوٹ کے بکھرا مِرا ہی شیش نگر تھا

دل دھڑکا قدم ٹھٹھکے پلٹ کر ہوا معلوم

جس نے یہ صدا دی تھی تِرا راہگزر تھا

اک اندھا ارادہ لیے جاتا ہے کسی سمت

جب ٹھہرے تو دیکھا نہ سفر تھا نہ حضر تھا

اس لذتِ تخلیق کی کاوش میں پھنسا جو

نکلا نہ کبھی اس سے یہ ایسا ہی بھنور تھا

منزل نہ تھی کوئی نہ ہی رستہ نظر آتا

یہ سب اسی تفریق و تعصب کا ثمر تھا

حمیدہ معین رضوی