بندگی کا وہ کسی کو جو صلہ دیتے ہیں

عارفانہ کلام نعتیہ کلام

بندگی کا وہؐ کسی کو جو صِلا دیتے ہیں

ذرۂ خاک سے خورشید بنا دیتے ہیں

جو ہو انؐ کے غلاموں کے غلاموں کا غلام

مرتبہ اس کا زمانے میں بڑھا دیتے ہیں

مجھ کو اس وقت دو عالم کا سکوں ملتا ہے

دھڑکنیں جب وہ مِرے دل کی جگا دیتے ہیں

جس کے اشکوں پر نگہِ لطف و کرم پڑ جائے

اس کو پھر گنبدِ خضرا بھی دکھا دیتے ہیں

اس سے بڑھ کر نہیں خوش بخت جہاں میں کوئی

جس کو از راہِ کرم خاکِ کفِ پا دیتے ہیں

انؐ کی رحمت کا تو اندازہ ہی کرنا ہے محال

دشمنِ جاں کو بھی جو دل سے دعا دیتے ہیں

کر سکا میں ہی نہ اظہارِ تمنا، ورنہ

مانگنے والوں کو وہ حد سے سوا دیتے ہیں

دل و جاں میں ہے عجب محفلِ میلاد کا رنگ

مہرباں ہوں تو وہ یوں اپنا پتا دیتے ہیں

رات دن شہرِ نبیؐ کا ہے تصور پرواز

دِن پھر آئے جو غمِ ہجر بڑھا دیتے ہیں

الطاف پرواز