آنکھیں غم فراق سے ہیں تر اِدھر اُدھر
غم کا اثر ہے آج برابر ادھر ادھر
تھے جو وفا شعار وہ نذرِ ستم ہوئے
اب کس کو ڈھونڈھتا ہے ستمگر ادھر ادھر
محفل میں تیرے حسن پہ قربان ہو گا کون
دیوانے چل دئیے جو نکل کر ادھر ادھر
ساقی کے ساتھ رونق مے خانہ بھی گئی
ٹوٹے پڑے ہیں شیشہ و ساغر ادھر ادھر
ایسا نہ ہو زمانہ ہنسے تم پر ایک دن
لکھو نہ میرے حال پہ ہنس کر ادھر ادھر
دل میں کبھی ہے درد، جگر میں کبھی خلش
جیسے چھپے ہوں سینے میں نشتر ادھر ادھر
اپنی غزل سناؤ شمیم اہلِ ذوق کو
ضائع کرو نہ فکر کے جوہر ادھر ادھر
شمیم فتحپوری
No comments:
Post a Comment