کون آ گیا یہ حشر کا ساماں لیے ہوئے

 کون آ گیا یہ حشر کا ساماں لیے ہوئے

دامن میں اپنے میرا گریباں لیے ہوئے

ہر ایک غم ہے عیش کا عنواں لیے ہوئے

شامِ خزاں ہے صبحِ بہاراں لیے ہوئے

سجدہ ہے میرا ذوقِ فراواں لیے ہوئے

اٹھے گا اب تو سر درِ جاناں لیے ہوئے

بعد رہائی بھی نہ میں زنداں سے جاؤں گا

بیٹھا رہوں گا عزتِ زنداں لیے ہوئے

اب بھی نہ خندہ لب ہوں مِرے زخم ہائے دل

وہ مسکرا رہے ہیں نمک داں لیے ہوئے

اے چارہ ساز بیٹھ یہ چارہ گری بھی دیکھ

اٹھے گا میرا درد ہی درماں لیے ہوئے

رنگینیٔ تبسم پیہم نہ پوچھیۓ

جیسے وہ آ رہے ہوں گلستاں لیے ہوئے

ایسا بھی کاش آئے محبت میں انقلاب

وہ آئیں میری دید کا ارماں لیے ہوئے

کیسی بہار آئی ہے اب کے بہ رنگِ نو

ہر ایک گُل ہے خونِ شہیداں لیے ہوئے

امکان سہو ہم سے بھی ممکن ہے اے شفا

انسانیت کا ہم بھی ہیں امکاں لیے ہوئے

شفا گوالیاری