سورج سر مژگاں ہے اندھیرے نہیں جاتے

سورج سرِ مژگاں ہے اندھیرے نہیں جاتے
ایسے تو کبھی چھوڑ کے بیٹے نہیں جاتے
تُو جانبِ صحرائے عدم چل دیا تنہا
بچے تو گلی میں بھی اکیلے نہیں جاتے
بے حرف صداؤں کے وہ محرم تیرے ہمدم
اسکول میں جاتے ہوئے دیکھے نہیں جاتے
آنکھوں میں چمکتے ہیں ترے نقش کف پا
اشکوں سے بھی یہ دیپ بجھائے نہیں جاتے
جو پھول سجانا تھے مجھے تیری جبیں پر
بھیگی ہوئی مٹی پہ بکھیرے نہیں جاتے
جو زخم برستے ہیں میرے ذہن پر اسلم
لکھنا تو بڑی بات ہے سوچے نہیں جاتے

اسلم کولسری

غزل کے مزید اشعار بھجوانے کے لیے میں جناب سلطان مغل صاحب کا مشکور ہوں۔ اس غزل کی تکمیل کا کریڈٹ انہی کے نام ہے، اس غزل کا بیک گراؤنڈ یہ ہے کہ اسلم بھائی نے اپنے جواں سال بیٹے کی ناگہانی وفات پر یہ اشعار کہے تھے، اب تو رضائے الٰہی سے اسلم بھائی بھی اس دنیائے فانی سے رخصت ہو گئے، اللہ پاک ان سب کے درجات بلند فرمائے آمین۔