کب سے خاموش سی گم سم سی یونہی بیٹھی ہوں

 زخمِ مسیحائی

کب سے خاموش سی گم سم سی یونہی بیٹھی ہوں

سامنے خط ہے تِرا

اور دل کے آنگن میں

موسمِ درد دبے پاؤں چلا آیا ہے

اور زخموں کی فصل اب کے بہت اچھی ہے

باتوں باتوں میں لگے دل پہ جو

اس بات کا زخم

دل کی منڈیروں پہ جم جائے جو

اس رات کا زخم

اس سیاہی میں جو گُم ہو گیا

اس ساتھ کا زخم

جو یقیں ٹُوٹ کے تبدیل ہوا ریزوں میں

روح میں چُبھتے کھٹکتے ہوئے

ذرّات کا زخم

تم نے لکھا ہے کہ

تم ذات کے زخموں کو سہنا سیکھو

تم بھی اوروں کی طرح دنیا میں رہنا سیکھو

مشورہ ہے تو بہت خوب

مگر

ایسی دنیا سے کہاں میری شناسائی ہے

یہ تِرا خط ہے یا

زخمِ مسیحائی ہے

شبنم رحمٰن