نظر کو وسعتیں دے بجلیوں سے آشنا کر دے
فسانہ طور کا تجدید اے جذبِ رسا کر دے
مٹا دے ذوقِ محویت سے خلوت اور جلوت کو
اگر تو کر سکے دل کو حریمِ دلربا، کر دے
حجاباتِ نظر کب تک کہاں تک دل کی محرومی
مدد اے شوق نظروں کو قیامت آزما کر دے
بنا ہے مے کدہ اہلِ ہوس کی بزم اے ساقی
تِرا ترکِ تعلق دیکھنا جانے نہ کیا کر دے
تِرے نغمے سرور و کیف میں اے تاج ڈھلتے ہیں
حدیثِ حسن و اُلفت کو دلوں کا مدعا کر دے
ظہیر احمد تاج
No comments:
Post a Comment