مسئلوں کے اس طرح اب حل نکالے جائیں گے

 مسئلوں کے اس طرح اب حل نکالے جائیں گے

آئینوں کے شہر میں پتھر اُچھالے جائیں گے

ہم‌ نے سوچا بھی نہ تھا آئے گا ایسا وقت بھی

ضابطے آئین کے سب توڑ ڈالے جائیں گے

مُفلسی بن جائے گی اک دن بغاوت کا سبب

ہم اگر یوں ہی فقط وعدوں پہ ٹالے جائیں گے

کس کا کتنا ظرف ہے ہو جائے گا یہ فیصلہ

بھیڑ میں چاندی کے سِکے جب اُچھالے جائیں گے

میں نے دیکھا ہے پڑوسی بھوک سے مرتے ہوئے

میرے منہ میں کس طرح یہ تر نوالے جائیں گے

اچھے دن بھی آئیں گے مل جائے گا سب کچھ تمہیں

اس سے پہلے ہاتھ لیکن کاٹ ڈالے جائیں گے

شہرتیں اتنی ہی ساغر بڑھ کے چُومیں گی قدم

جس قدر بھی آپ پر پتھر اُچھالے جائیں گے

ریاض ساغر