مجھ ایسے میلے کچیلے کا کیا تعارف ہے

 مجھ ایسے میلے کچیلے کا کیا تعارف ہے

مگر کرم ہے یہ اُنؐ کا، بڑا تعارف ہے

او جھُوٹ مُوٹ کے سچے فسانہ گو سُن لے

صداقتوں کا فقط کربلا تعارف ہے

یہی ہے گھر کہ گھرانوں میں اک چُنیدہ گھر

اسی لیے تو یہاں مصطفٰےﷺ تعارف ہے

تِرے عقیدے میں جو بھی ہے بھائی مجھ کو کیا

مِرے عقیدے میں انؐ کا خُدا تعارف ہے

ہے پانچ پُشت سے شبیرؑ کا ثنا خواں تُو

انیس تجھ پہ میں قربان؛ کیا تعارف ہے

ہے میرا پہلا تعارف غلامِ آلِ نبیﷺ

نواب ہوں یہ مِرا دوسرا تعارف ہے

آفتاب نواب