خوب بوجھا ہوں میں اس یار کوں کوئی کیا جانے

خوب بُوجھا ہوں میں اس یار کوں کوئی کیا جانے

اس طرح کے بُتِ عیار کوں کوئی کیا جانے

لے گئیں ہات سیں دل اس کی جُھکی ہوئی آنکھیں

حیلۂ مردم بیمار کوں کوئی کیا جانے

میں نہ بُوجھا تھا تِری زُلف گِرہ دار کے پیچ

سچ کہ کیفیتِ مکار کوں کوئی کیا جانے

شرح بے تابیٔ دل نیں ہے قلم کی طاقت

تپشِ شوق کے طومار کوں کوئی کیا جانے

شربتِ خونِ جگر کا مزہ عاشق پاوے

لذتِ عشقِ جگر خار کوں کوئی کیا جانے

مشربِ عشق میں ہیں شیخ و برہمن یکساں

رشتۂ سبحہ و زنّار کوں کوئی کیا جانے

نمک زخم ہوا مرہم جالینوسی

خلشِ سینۂ افگار کوں کوئی کیا جانے

طوق و زنجیر نہیں جس پہ کسے رحم آوے

دامِ الفت کے گرفتار کوں کوئی کیا جانے

جب تلک تلخیٔ شورابۂ غم چاکھا نیں

تب تلک لذت دیدار کوں کوئی کیا جانے

قدر اوس نافۂ تاتار کی مجھ سیں پوچھو

یار کی زُلف کی مہکار کوں کوئی کیا جانے

میں کہا؛ زخمیٔ غم ہوں تو دیا اس نے جواب

اے سراج ایسے چُھپے وار کوں کوئی کیا جانے

سراج اورنگ آبادی