عذاب جان کا یا رب یوں امتحان نہ ہو

 عذابِ جان کا یا رب یوں امتحان نہ ہو

خزاں کا پھول بہاروں کے درمیان نہ ہو

زرا سی دیر کوئی مسکرا دیا ہے تو کیا

اب اس قدر بھی مِری جان خوشگمان نہ ہو

کہیں زمیں پہ کوئی راستہ بتا ایسا

کہ ساری عمر چلوں جس پر اور تھکان نہ ہو

یہ خاک ہنستی ہوئی یونہی آتی جاتی رہے

مِرے خدا کبھی ویراں یہ خاکدان نہ ہو

کہاں کہاں ہیں سبھی رفتگاں نظر آئیں

ہمارے بیچ میں حائل جو آسمان نہ ہو

وہ بن سنور کے بڑی دیر سے ہے پہلو نشیں

مجھے یہ ڈر ہے کہیں یہ مِرا گمان نہ ہو

میں سائے میں ہوں مگر پھر بھی جلتا رہتا ہوں

مِرا شجر بھی کہیں دھوپ کا مکان نہ ہو

دکھائی دے قد و قامت کے ساتھ تو خالد

کوئی نظر نہ پڑے اتنا بے نشان نہ ہو

خالد سجاد احمد