فراق و وصل کا یہ درمیاں بھی خوبصورت ہے

 فراق و وصل کا یہ درمیاں بھی خوبصورت ہے

جہاں میں ہوں وہاں رنگِ خزاں بھی خوبصورت ہے

غبارِ شامِ تنہائی کے اس بجھتے جھرونکے سے

اگر دیکھو تو اک منظر یہاں بھی خوبصورت ہے

کوئی ندی سی بل کھاتی ہوئ دل سے گزرتی ہے

سرِ کوہسار یہ موجِ رواں بھی خوبصورت ہے

رہِ برباد کو اپنے تئیں آباد رکھنے میں

تِرے ہونے نہ ہونے کا گماں بھی خوبصورت ہے

یہاں ٹیبل پہ رکھے کانچ کے گلدان کے نیچے

کسی خط میں پڑی اک داستاں بھی خوبصورت ہے

تبھی تو لوٹ کر آتے نہیں ہیں رفتگاں شاید

یہ سنتے ہیں کہ اک دنیا وہاں بھی خوبصورت ہے

اشرف یوسفی