یہ تکمیل عبادت ہے خدا سے دل لگا لینا

عارفانہ کلام حمدیہ کلام

یہ تکمیلِ عبادت ہے خدا سے دل لگا لینا

یہی تکمیلِ سنت ہے دعاؤں سے دوا لینا

مِرے سینے سے اے مولیٰ مٹا دے خواہشِ دنیا

جسے خالق سے الفت ہو اسے دنیا سے کیا لینا

کہاں میں جاؤں گی یا رب سہارا چھوڑ کر تیرا

یہ دنیا سازشوں کی ہے مجھے بس تو بچا لینا

مجھے بھی چاہئے یارب تیری قربت، تیری جنت

تِرا ہی خوف ہو دل میں مجھے اپنا بنا لینا

جہاں میں ہر طرف عصیاں کے ہیں چھائے ہوئے بادل

مرے اللہ! تُو مجھ کو گناہوں سے بچا لینا

بڑی تسکین ملتی ہے تلاوت سے عبادت سے

کتابوں میں لکھا دیکھا خدا سے لَو لگا لینا

بڑی حسرت ہے دل میں کہ تِرے گھر کی زیارت ہو

مجھے حاصل سعادت ہو مجھے در پر بلا لینا

زارا فراز