دے مجھ کو زباں وہ کہ کروں شکر ادا میں

عارفانہ کلام حمدیہ کلام

دے مجھ کو زباں وہ کہ کروں شکر ادا میں

مالک ہے مِرا تُو، تِرا بندہ ہوں خدا میں

کہتے ہیں کہ نزدیک رگِ جاں سے بھی ہے تو

رہ سکتا ہوں پھر کیسے بھلا تجھ سے جدا میں

چلتا ہوں میں پھرتا ہوں یہ سب تیرا کرم ہے

ورنہ تِرے احسان سے یا رب ہوں لدا میں

اک جان مِری اور کرم سیکڑوں تیرے

سو بار کروں تجھ پہ دل و جان فدا میں

اللہ، مجھے اور عطا، اور عطا ہو

داتا مِرے داتا مِرے داتا ہوں گدا میں

ہر شعر تِرے صدقے فن و فکر تِرے نام

اس طرح بھی کچھ اپنا کروں فرض ادا میں

بدر محمدی