زیب گلشن نہ بنے رونق ویرانہ بنے

 زیبِ گلشن نہ بنے رونقِ ویرانہ بنے

کتنے ہشیار تھے جو عشق میں دیوانہ بنے

کچھ پتنگوں ہی پہ موقوف نہیں جانِ وفا

جو بھی آ جائے تِری بزم میں پروانہ بنے

کتنے دلچسپ ہیں اس شوخ نظر کے انداز

کوئی دیوانہ نہ بنتا ہو تو دیوانہ بنے

دل کی دنیا کی الٹ پھیر الٰہی توبہ

جتنا آباد کیا جائے یہ ویرانہ بنے

کاش اک ربط رہے ان کی نظر سے بسمل

کبھی آئینہ بنے دل کبھی پیمانہ بنے

بسمل آغائی