بدن پر آبلے تلوؤں پہ جب چھالوں کا قبضہ تھا
تو ہر شہرِ ستم پر حوصلہ والوں کا قبضہ تھا
کھنڈر میں ہو گئے تبدیل جو اونچے محل کل تھے
سناہے ہم نے ان پر حور سے گالوں کا قبضہ تھا
وہاں اہلِ سیاست اب دوکاں اپنی چلاتے ہیں
جہاں بندوق دھاری مافیا والوں کا قبضہ تھا
سنا ہے میں نے ان کی گفتگو سے پھول جھڑتے تھے
زمانے کے دلوں پر جب غزل والوں کا قبضہ تھا
اب ان کے جسم پر عریاں مناظر رقص کرتے ہیں
کیلنڈر کے بدن پر کل ندی نالوں کا قبضہ تھا
یہ جب کی بات ہے ہم شہر میں شاعر نہ تھے اشرف
تو ایوانِ ادب پر بس سند والوں کا قبضہ تھا
اشرف یعقوبی
No comments:
Post a Comment