جب بھی رستے میں کوئی جاگتا مقتل آئے
وقت کے ماتھے پہ تشکیک زدہ بل آئے
دھوپ کے دشت میں کب موسمی تبدیلی ہوئی
جانے کب سر پہ مِرے یاد کے بادل آئے
مجھ کو اس خواب کی ہریالی پہ پیار آتا ہے
جس میں کچھ وقت بتانے کوئی جنگل آئے
رت جگا رسم ہے اور رسم عبادت جیسی
رات گھر میں نہ مِرے نیند سے بوجھل آئے
ایک تُو ہے کہ تجھے آنے کی توفیق نہیں
اک تِری یاد کہ جو یاد مسلسل آئے
پھر کھلے مجھ پہ پری زاد تِرا گہرا فسوں
گر کبھی خواب مِرے ہاتھ مکمل آئے
گل مِری کایا پلٹنے کو ہے درویش بہت
بادشاہت کو الٹنے کوئی پاگل آئے
گل جہان
No comments:
Post a Comment