شہر میں تجھ سے تھک گیا ہوں

 شہر

لوگ کہتے ہیں کہ تجھ سے تھک جانا

مر جانے کے برابر ہے

اور مجھے بھی کبھی کبھی ایسا ہی لگتا ہے

تو سن شہر میں تجھ سے صاف صاف کہہ دوں

کہ میں تجھ سے تھک گیا ہوں

یا مجھے یوں لگتا ہے

کہ میرے سر سے اس باپ کا سایہ اٹھ گیا ہے

جو اتنے دنوں میری نگہبانی کر رہا تھا

سن شہر

اگر مر جاؤں

اور لوگ مجھے دفنانے لے جائیں

تو جھپٹ کے تو مجھے گود میں لے لینا

اور بال کھولے کہانی والی ماؤں کی طرح

مجھے آنچل میں چھپا کر چیخ چیخ کر ان سے کہہ دینا

کہ؛ نہیں یہ میرا بیٹا ہے

میرے جیتے جی یہ کبھی یتیم نہیں ہو سکتا

نہ ہی

میرے جیتے جی کوئی اسے مجھ سے چھین سکتا ہے

عین رشید