خوگر غم ہیں کرم کی التجا کرتے نہیں

خُوگرِ غم ہیں کرم کی اِلتجا کرتے نہیں

ہم خُوشی لے کر طبیعت بے مزا کرتے نہیں

آرزُو ہم اپنے سینے سے جُدا کرتے نہیں

مُدعا رکھتے ہیں، عرضِ مُدعا کرتے نہیں

تیری مرضی ہے جسے چاہے نواز اے چشمِ یار

ہم تو ان باتوں میں اپنا جی بُرا کرتے نہیں

جس کی آتی ہے، اسیرِ زُلف ہو جاتا ہے وہ

وہ تو دانستہ گرِفتارِ بلا کرتے نہیں

ہنس کے یوں کہنا کسی کا وعدۂ فردا کے بعد

یہ بھی سُن لو؛ ہم کبھی وعدہ وفا کرتے نہیں

کس سے دیکھی جائے گی وہ چشمِ تر وقتِ وِداع

اس لیے ہم ان سے مِلنے کی دُعا کرتے نہیں

ہو نہ جب تک ہم کو اپنے دل پہ کامل اعتماد

ہم کسی کافر ادا کا سامنا کرتے نہیں

کامل چاندپوری