دیکھ اے اہل وفا تجھ سے یہ کیا چاہتی ہے

 دیکھ اے اہلِ وفا تجھ سے یہ کیا چاہتی ہے

بے سہاروں کی صدا دستِ دعا چاہتی ہے

اب کے اک شب کی بیاہی کا سہاگ اجڑا ہے

اور، دنیا ہے کہ؛ دلہن سے حیا چاہتی ہے

قتل ہوتا ہے ہے سرِ راہ تو ہونے بھی دو

"روز اک تازہ خبر خلقِ خدا چاہتی ہے"

کیوں کوئی ایسی خدائی کو کرے دل سے قبول

جو سدا شکوۂ اربابِ وفا چاہتی ہے

گھر میں آنے سے اسے کون بھلا روکے گا

در مقفّل ہے تو دیوار کھُلا چاہتی ہے

اتنا خود سر بھی نہیں ہوں کہ جلا دوں گھر کو

میں وہی چاہوں گا جو مجھ سے ہوا چاہتی ہے

بیچ آیا ہوں رضا اپنی میں تلوار کے ساتھ

اور رگِ جاں ہے کہ یہ اپنی انا چاہتی ہے

حسن امام رضوی