چراغِ گمشدہ میں خواب کی تعبیر روشن تھی
اسی سے عشق نامے کی ہر اک تحریر روشن تھی
فضائیں مضطرب تھیں، غرفہ و دالاں میں ماتم تھا
نوا حِ جان میں بھی ساعتِ دلگیر روشن تھی
ندی، صحرا، ستارے اشک باراں تھے شبِ غم میں
ادھر خیمے کے اندر رات کی جاگیر روشن تھی
چراغِ آہ و زاری سے فروزاں طاقچے سارے
شبِ ہجراں میں وحشت کی نئی تصویر روشن تھی
عجائب خانۂ گردش میں صورت تھی کوئی ایسی
جہاں تلوار ٹوٹی تھی، وہاں شمشیر روشن تھی
چراغوں کی لویں جب کم سخن تھیں، اک صدا ابھری
جبینِ سرخ آتش پر وہی تقریر روشن تھی
غلام آباد کے صحن و دریچہ تھے سراسیمہ
در و دیوار پر کیسے ر گِ زنجیر روشن تھی
بریدہ تھے لب و رخسار، آنکھوں میں چمک باقی
پسِ زِنداں نگاہِ حسرتِ توقیر روشن تھی
ہمایوں جاوید
No comments:
Post a Comment