جب ترا دل میں نور ہوتا ہے

 جب ترا دل میں نُور ہوتا ہے

پاس شعلۂ طُور ہوتا ہے

تابِ نظارہ تھی نہیں ورنہ

تُو کہاں مجھ سے دور ہوتا ہے

عجز دستارِ آدمیت ہے

سمِ قاتل غرور ہوتا ہے

گفتگو کم کرے، سنے زیادہ

آدمی با شعور ہوتا ہے

بے سبب کب عذاب آتے ہیں

لازماً کچھ قصور ہوتا ہے

بجلیاں حادثوں کی گرتی ہیں

جب خوشی کا وفور ہوتا ہے

یوں کسی سے گلہ نہیں ہوتا

کوئی رشتہ ضرور ہوتا ہے

سوچ مثبت اگر ملے بسمل

غم میں بھی پھر سرور ہوتا ہے

خورشید احمد بسمل