اے ابر التفات ترا اعتبار پھر

 اے ابرِ التفات! تِرا اعتبار پھر

آنکھوں میں پھر وہ پیاس وہی انتظار پھر

رکھوں کہاں پہ پاؤں بڑھاؤں کدھر قدم

رخشِ خیال آج ہے بے اختیار پھر

دستِ جنوں و پنجۂ وحشت چہار سمت

بے برگ و بار ہونے لگی ہے بہار پھر

پسپائیوں نے گاڑ دئیے دانت پشت پر

یوں دامنِ غرور ہوا تار تار پھر

نشتر تِری زباں ہی نہیں خامشی بھی ہے

کچھ رہگزارِ ربط ہوئی خار زار پھر

مجھ میں کوئی سوال تِرے ماسوا نہیں

مجھ میں یہی سوال ہوا ایک بار پھر

اکرم نقاش