زمانے کے سبھی دلکش نظارے

 زمانے کے سبھی دلکش نظارے

زکوٰۃ حسن لگتے ہیں تمہارے

محبت کا کوئی امکاں نہیں جب

تو پھر دل کیوں دھڑکتے ہیں ہمارے

یقیں جانو مِری جاں! ہم ازل سے

تمہارے ہیں تمہارے ہیں تمہارے

کسی کا چاند چہرہ یاد آیا

فلک پہ جس گھڑی چمکے ستارے

وصال و ہجر دونوں جان لیوا

خدا را کوئی اپنا دل نہ ہارے

ہم اس سے دور ہوتے جا رہے ہیں

رگ جاں سے قریں ہے جو ہمارے

وہ بچپن یاد آتا ہے کسی کا

میں جب دیکھوں کہیں اڑتے غبارے

وصالِ یار ناممکن ہے ایسے

کہ جیسے اک ندی کے دو کنارے

زمانے بھر سے ہم سو بار جیتے

کسی سے ہم مگر سو بار ہارے

سہارے ڈھونڈنے والوں کی طارق

نہیں لگتی کبھی کشتی کنارے

طارق ملک