کتنے اسرار واہمے میں ہیں

 کتنے اسرار واہمے میں ہیں

ہم کہ مصروف کھوجنے میں ہیں

ہم سفر لا مکان کو پہنچا

اور ہم پہلے مرحلے میں ہیں

تُو ابھی تک دِکھا نہیں ہے ہمیں

ہم ابھی تک مراقبے میں ہیں

آئینے سے اثر لیا گیا ہے

آئینے سے اثر لیا گیا ہے

خود کو تسلیم کر لیا گیا ہے

رزق اترے گا آسمانوں سے

کھیت پانی سے بھر لیا گیا ہے

کوئی آواز بھی نہیں آتی

کس خرابے میں گھر لیا گیا ہے

حادثوں کے ریلے ہیں مشکلوں کے میلے ہیں

 حادثوں کے ریلے ہیں، مشکلوں کے میلے ہیں

ہم نے چند ہی دن میں کیا عذاب جھیلے ہیں

زندگی کے طوفاں میں کون ساتھ دیتا تھا

جب بھی ہم اکیلے تھے، اب بھی ہم اکیلے ہیں

آج کل تو ہے اعجاز، راستے بھی کٹ جانا

ہر قدم رکاوٹ ہے، ہر قدم جھمیلے ہیں

ہر قدم ایک امتحاں سا ہے

 ہر قدم ایک امتحاں سا ہے

دل مِرا ٹوٹتا مکاں سا ہے

رات کالی ہے آج کیوں اتنی

ہر طرف کیوں دھواں دھواں سا ہے

تیری خوشبو بسی ہے سانسوں میں

گھر مِرا ایک گلستاں سا ہے

اک سایہ میرے جیسا ہے

 اک سایہ میرے جیسا ہے

جو میرا پیچھا کرتا ہے

اب شور سے عاجز سناٹا

کانوں میں باتیں کرتا ہے

اس موڑ کے آگے رستہ ہے

میں ایک ٹھکانہ ڈھونڈتا ہوں

اے بگولے کے لبادے میں سمائی ہوئی ریت

 اے بگولے کے لبادے میں سمائی ہوئی ریت

ساتھ رکھ لے مجھے اے وجد میں آئی ہوئی ریت

تاکہ سورج قریں آئے تو یہ صحرا ہو جائے 

سو سمندر تلے اس نے ہے بچھائی ہوئی ریت 

بیٹھے بیٹھے مجھے چوراہا💢 بنا دیتی ہے 

چار سمتوں سے مِری سمت اڑائی ہوئی ریت 

میری آنکھوں سے گزر کر دل و جاں میں آنا

 میری آنکھوں سے گزر کر دل و جاں میں آنا

جسم میں ڈھل کے مِری روح رواں میں آنا

کھو نہ جانا مِری جاں سرحد جاں تک آ کے

قرب کا پاس لیے بعد کراں میں آنا

میں تِرے حسن کو رعنائی معنی دے دوں

تو کسی شب مِرے انداز بیاں میں آنا