ہر پھول کے چہرے پہ دِکھاوے کی ہنسی ہے
آنگن میں بہاروں کے خِزاں ناچ رہی ہے
بادل بہت آئے گئے، دھرتی رہی پیاسی
لگتا ہے سمندر ہی پہ برسات ہوئی ہے
یاروں نے کھڑی جھوٹ کی دیوار تو کر لی
نِکلی وہ مگر ریت کی جو بیٹھ گئی ہے
قِسمت کا لِکھا وقت پہ مِل کر ہی رہے گا
جس شے پہ مِرا نام تھا وہ مجھ کو مِلی ہے
اک حُسن کا بہتا ہوا دریا سہی دنیا
کس کی مگر آنکھوں کی یہاں پیاس بُجھی ہے
ظاہر کے خداؤں سے تو دنیا ہے سوالی
جو سب کا خدا ہے یہ اسے بھُول گئی ہے
عاقل کا پتہ پوچھنے والوں کو بتا دو
اس عالمِ مستی میں خوشی ہے نہ غمی ہے
دھرم پال عاقل
No comments:
Post a Comment