حسن جب مہرباں ہو تو کیا کیجئے

حسن جب مہرباں ہو تو کیا کیجئے
عشق کی مغفرت کی دعا کیجئے
اس سلیقے سے ان سے گِلہ کیجئے
جب گِلہ کیجئے، ہنس دیا کیجئے
دوسروں پر اگر تبصرہ کیجئے
سامنے آئینہ رکھ لیا کیجئے
آپ سکھ سے ہیں ترکِ تعلق کے بعد
اتنی جلدی نہ یہ فیصلہ کیجئے
زندگی کٹ رہی ہے بڑے چین سے
اور غم ہوں تو وہ بھی عطا کیجئے
کوئی دھوکا نہ کھا جائے میری طرح
ایسے کھل کے نہ سب سے مِلا کیجئے
عقل و دل اپنی اپنی کہیں جب خمار
عقل کی سنئے، دل کا کہا کیجئے

خمار بارہ بنکوی