آیا ہے کون کیوں یہ ہوا مشکبار ہے

آیا ہے کون کیوں یہ ہوا مُشکبار ہے

موسم کا بھی مزاج بہت خوشگوار ہے

شبنم نے فرطِ شوق میں موتی لُٹائے ہیں

لبریز گُل کے ہاتھ میں جامِ بہار ہے

میٹھا سا ایک گیت ہے موجوں کے شور میں

دریا کے پار کس کو مِرا انتظار ہے

سرگوشیوں میں عہدِ وفا کر رہے ہو کیوں

لو کہہ دیا نا! میں نے مجھے اعتبار ہے

گھر میرا کھو گیا ہے مگر یاد ہے مجھے

آنگن میں اس کے اک شجرِ سایہ دار ہے

تاجوں پہ جس نے کوئی قصیدہ نہیں لکھا

تختِ سُخن پہ آج وہی تاجدار ہے

تازہ غزل کہی ہے زمیں میں انیس کی

لہجے میں میرے آج غضب کا نکھار ہے

مونا یقین کی نہیں ایماں کی بات ہے

آلِؑ رسولﷺ پہ تو مِری جاں نثار ہے

مونا شہاب