محبت میں جفا ہوتی رہی ہے
نہ جانے کیا خطا ہوتی رہی ہے
کسے معلوم میرے دل کی حالت
تِری محفل میں کیا ہوتی رہی ہے
متاعِ کارواں لُٹتے ہوئے بھی
تلاشِ رہنما ہوتی رہی ہے
ہمیشہ بزم میں واعظ کے ہوتے
پراگندہ فضا ہوتی رہی ہے
وفا اپنی فریبِ عاشقی تھی
جفا ان کی ادا ہوتی رہی ہے
جہاں پڑھنے گئے نیرنگ وہاں پر
غزل پر واہ وا ہوتی رہی ہے
نند لال نیرنگ سرحدی
مندھرا، ڈیرہ اسماعیل خان، ریواڑی گوڑگاؤں
No comments:
Post a Comment