شب کے کالے گُنبد میں اک نُوری در تخلیق ہو
قُدرت کے ہاتھوں سے کیا عُمدہ منظر تخلیق ہوا
پہلے آہن زاد چھُری سے نازک گردن کٹتی تھی
پھر دل پر برسانے کو لفظی خنجر تخلیق ہوا
قطرہ قطرہ جُثہ پگھلا ہاتھوں پر چھالے چمکے
ایک گھروندا رہنے قابل تب جا کر تخلیق ہوا
کچھ کے رستے کانٹوں کے دالان سے ہو کر جاتے ہیں
کچھ کے پاؤں رکھنے کو سنگِ مر مر تخلیق ہوا
بے ترتیبی کے پردے میں ایک مُرتب دُنیا ہے
یُوں لگتا ہے سارا عالم نقشے پر تخلیق ہوا
کارِ تخلیقیت میں مصروف خُدا کے ہاتھوں سے
جو کچھ بھی تخلیق ہوا ہے بے حد سُندر تخلیق ہوا
نواز کمال
No comments:
Post a Comment