اب کے برسات کی رت اور بھی بھڑکیلی ہے

اب کے برسات کی رُت اور بھی بھڑکیلی ہے 

جسم سے آگ نکلتی ہے قبا گیلی ہے 

سوچتا ہوں کہ اب انجام سفر کیا ہو گا 

لوگ بھی کانچ کے ہیں راہ بھی پتھریلی ہے 

شدّتِ کرب میں ہنسنا تو کرب ہے میرا 

ہاتھ ہی سخت ہے زنجیر کہاں ڈھیلی ہے 

گرد آنکھوں میں سہی داغ تو چہرے پہ نہیں 

لفظ دھندلے ہیں مگر فکر تو چمکیلی ہے 

گھول دیتا ہے سماعت میں وہ میٹھا لہجہ 

کس کو معلوم کہ یہ قَند بھی زہریلی ہے 

پہلے رگ رگ سے میری خون نچوڑا اس نے 

اب یہ کہتا ہے کے رنگت ہی مری پیلی ہے 

مجھ کو بے رنگ ہی نہ کر دے کہیں رنگ اتنے 

سبز موسم ہے، ہوا سرخ، فضا نیلی ہے 

مری پرواز کسی کو نہیں بھاتی تو نہ بھائے 

کیا کروں ذہن مظفرؔ میرا جبرائیلی ہے 

مظفر وارثی