دیار دل نہ رہا بزم دوستاں نہ رہی

دیارِ دل نہ رہا بزمِ دوستاں نہ رہی

اماں کی کوئی جگہ زیرِ آسماں نہ رہی

رواں ہیں آج بھی رگ رگ میں خون کی موجیں

مگر وہ ایک خلِش، وہ متاعِ جاں نہ رہی

لڑیں غموں کے اندھیروں سے کس کی خاطر ہم

کوئی کِرن بھی تو اس دل میں ضوفشاں نہ رہی

میں اس کو دیکھ کے آنکھوں کا نور کھو بیٹھا

یہ زندگی مِری آنکھوں سے کیوں نہاں نہ رہی

زباں ملی تھی تو کس وقت بے زبانوں کو

سنانے کے لیے جب کوئی داستاں نہ رہی

شہریار خان