اعجازِ جاں وہی ہے ہمارے کلام کو
زندہ کیا ہے ہم نے مسیحا کے نام کو
لِکھو سلام غیر کے خط میں غلام کو
بندے کا بس سلام ہے ایسے سلام کو
اب شور ہے مثال جو دی اس خرام کو
آتا ہے بہرِ قتل وہ دور اے ہجومِ یاس
گھبرا نہ جائے دیکھ کہیں اژدہام کو
گو آپ نے جواب برا ہی دیا، وَلے
مجھ سے بیاں نہ کیجے عدو کے پیام کو
یاں وصل ہے تلافئ ہجراں میں اے فلک
کیوں سونچتا ہے تازہ ستم انتقام کو
تیرے سمندِ ناز کی بے جا شرارتیں
کرتے ہیں آگ نالۂ اندیشہ کام کو
سن سن کے نادرست تِری خُو بگاڑ دی
ہم نے خراب آپ کیا اپنے کام کو
اس سے جلا کے غیر کو امیدِ پختگی
لگ جائے آگ دل کے خیالاتِ خام کو
جب تُو چلے جنازۂ عاشق کے ساتھ ساتھ
پھر کون وارثوں کے سنے اذنِ عام کو
شاید کہ دن پھِرے ہیں کسی تیرہ روز کے
اب غیر اس گلی میں نہیں پھِرتے شام کو
مدت سے نام سنتے تھے مومنؔ کا بارے آج
دیکھا بھی ہم نے اس شعرا کے امام کو
مومن خان مومن
No comments:
Post a Comment