رفاقت میں رفیقوں کی ریا کاری بھی شامل ہے

 رفاقت میں رفیقوں کی ریا کاری بھی شامل ہے

مِری آسانیوں میں کارِ دُشواری بھی شامل ہے

بجز تصویر گل کے باغ میں دیکھوں تو کیا دیکھوں

عقیدت کے اثر میں خود سے بیزاری بھی شامل ہے

کبھی وہ خوں بہاتا ہے، کبھی آنسو بہاتا ہے

عداوت کی ادا میں طرزِ غمخواری بھی شامل ہے

سمجھنے سوچنے سے ہی نہیں ملتی مجھے فرصت

مِری مصروفیت میں شغل بے کاری بھی شامل ہے

گداؤں کو ترستے ہیں سبھی جاہ و حشم والے

امیری کی عطا میں لطف ناداری بھی شامل ہے

نہ جیتا ہے نہ مرتا ہے عجب انسان ہے راحت

نئی بیماریوں میں اب یہ بیماری بھی شامل ہے

راحت حسن