اسی گمان میں اکثر مکاں بدلتے ہیں

 اِسی گُمان میں اکثر مکاں بدلتے ہیں

زمیں بدلتی ہے تو آسماں بدلتے ہیں

ہمی تو ہیں جو تجسس بھری نگاہوں سے

تمام شب کی پریشانیاں بدلتے ہیں

اسی لیے تو تِرے در پہ گِر گیا تھا میں

میں جانتا تھا مقدر یہاں بدلتے ہیں

تِری نگاہ سے قوسِ قزح نکلتی ہے

وگرنہ دشت کے منظر کہاں بدلتے ہیں

وہ جب یہاں تھا تو ہم دیکھتے نہ تھے اس کو

وہ جا رہا ہے تو ہم کھڑکیاں بدلتے ہیں

تجمل کاظمی