یہ بات نہیں ہے کہ تجھی سے نہیں ملتا

یہ بات نہیں ہے کہ تجھی سے نہیں مِلتا

اک عمر ہوئی ہے میں کسی سے نہیں ملتا

دنیا سے تو ملتا ہے پتا تیری گلی کا

دنیا کا پتا تیری گلی سے نہیں ملتا

جو سست قدم ہیں وہی پا لیتے ہیں منزل

اس عشق میں کچھ تیز روی سے نہیں ملتا

اس بزم میں جاتا ہوں میں جس شخص سے ملنے

اس بزم میں جا کر میں اسی سے نہیں ملتا

یہ بات بھی آشفتہ سری نے ہی بتائی

کچھ بھی یہاں آشفتہ سری سے نہیں ملتا

فرہاد ہو، رانجھا ہو کہ وامق ہو کہ مجنوں

احوال مِرا ان میں کسی سے نہیں ملتا

عقیل عباس