ہمراہ لطف چشم گریزاں بھی آئے گی

ہمراہ لطف چشمِ گریزاں بھی آئے گی

وہ آئیں گے تو گردش دوراں بھی آئے گی

نکلے گی بوئے زلف ہماری تلاش میں

صحرا میں اب ہوائے گلستاں بھی آئے گی

ہم خود ہی بے لباس رہے اس خیال سے

وحشت بڑھی تو سوئے گریباں بھی آئے گی

ڈھونڈھے گی سر برہنہ ہمیں دشتِ ہجر میں

اک دن جنوں میں غیرت جاناں بھی آئے گی

اے رہ نوردِ عشق! سنبھل کر قدم بڑھا

اس راستے میں ظلمت ہجراں بھی آئے گی

کٹ جائے گا یہ کرب شبِ غم بھی اے ظہیر

صبحِ نشاط و فصلِ نگاراں بھی آئے گی

ظہیر کاشمیری