رقص کا حصہ رہے وجد میں آیا نہ گیا

 رقص کا حصہ رہے وجد میں آیا نہ گیا

زُلف رکھی نہ گئی، لُطف اٹھایا نہ گیا

اس سے اندازہ لگا ہجر کی کڑواہٹوں کا

آخری خط تِرا دیمک سے بھی کھایا نہ گیا

آتشِ دل میں بھی اک دل کا گماں ہوتا ہے

جس سے اس گھر کے مکینوں کو جلایا نہ گیا

دل کے چوبارے پہ کووں کے گلے بیٹھ گئے

بعد تیرے کوئی مہمان بھی آیا نہ گیا

کمسنو! جھوٹا کیا رزقِ تخیّل بے سبب

دودھ کے دانتوں سے اک لقمہ چبایا نہ گیا

عین عمر