ہونٹوں سے دور رکھ کہیں ہونٹوں کا یہ سبو

 ہونٹوں سے دور رکھ کہیں ہونٹوں کا یہ سبو

میں تو خود اپنے آپ سے ہوں محوِ گفتگو

میں خانقاہِ دل میں جلاتی رہی چراغ

اس آس میں کہ تُو ہو کبھی میرے روبرو

اُس نے مِرے خیالوں کو تجسیم کر دیا

وہ جو دکھائی دیتا ہے مجھ کو چہار سو

کرتا ہے وہ یاد کسے، اس سے غرض نہیں

مجھ کو تو ہر گھڑی ہے صدف اس کی جستجو

(ق)

تاریخ کے دیار میں اک میں ہوں ایک تو

اور دونوں ہر مقام پہ موضوعِ گفتگو

تُو ہے شکنتلا کے کہیں انتظار میں

اور میں ہوں کالی داس کے خوابوں کی آبرو

تُو بونواس کوئی، روزینہ کے ہاتھ میں

خیّام کی رباعی سے میری ہوئی نمو

تو مادھو لال کا کوئی نازل شدہ جمال

میں ہیر شہرِ عرش کی، مجھ سے کلامِ ہو

عورت ہوں میں، قلم مِرا چاہت کے واسطے

پروین کی تمنا ہوں، سیفو کی جستجو

یادوں کے رتھ پہ بیٹھ کے شہرِ خیال میں

کرتا ہے کوئی صغرا صدف تیری آرزو

صغرا صدف

صغریٰ صدف