نکلنا پڑتا ہے خود کی نہیں نہیں سے مجھے

 نکلنا پڑتا ہے خود کی نہیں نہیں سے مجھے

کوئی پُکارنے لگتا ہے جب یقیں سے مجھے

ادھورا خواب ہوں تعبیر ڈھونڈنی ہے مجھے

اُڑا گیا ہے کوئی چشمِ خشمگیں سے مجھے

خبر نہیں کہ میں پھر اس کے کام آ بھی سکا

کوئی خرید کے لایا تھا مہ جبیں سے مجھے

کہیں مدار سے ہٹنے کی جستجو میں نہ ہو

سنائی دیتی ہے لا کی صدا زمیں سے مجھے

سجا تو آیا ہوں مسکان اس کے ہونٹوں پر

اتارنی ہے شکن اب کے اس جبیں سے مجھے

تمہارے ساتھ ابھی دوستی نہیں ہے، مگر

نکالنے ہیں کئی دوست آستیں سے مجھے

زاہد خان