جل کے ٹھنڈے ہوے ترے غم میں

جل کے ٹھنڈے ہوئے تِرے غم میں

ہم کو جنت ملی جہنم میں 

کچھ تِرا شوق کچھ تِری حسرت

اور رکھا ہی کیا ہے اب ہم میں

عرق آلودہ رخ تِرا شبِ وصل

غرق ہے آفتاب شبنم میں 

کیا اس نازکی پہ دعویٰ ہے

آپ پھرتے ہیں چشمِ عالم میں

چل گئی چال آپ کی ہم پر

سیدھے سادھے تھے آ گئے دم میں

ہو گیا عید ان کو میرا سوگ

قہقہے اڑ رہے ہیں ماتم میں

رو سیاہی گئی نہ اے زاہد

ڈوب مرنا تھا چاہِ زمزم میں

بزمِ دشمن میں کس طرح مرتا

موت آتی نہیں جہنم میں

دل کی قیمت بہت ہے نیم نگاہ

یہ تو آۓ گا اس سے بھی کم میں

دل کو آشفتگی نے کیوں گھیرا

یہ بھی ہو جمع زلفِ برہم میں

جب سے دیکھی ہے ہم نے تیری پلک

پڑ گیا بال چشمِ پُر نم میں

اب عنایت ہے کیوں خدا کے لیے

کون سی بات بڑھ گئی ہم میں

داؔغ کو وہ جلا کے کہتے ہیں

ہم نے روشن کیا ہے عالم میں

داغ دہلوی