محبت زندہ رہتی ہے محبت زندہ رکھتی ہے

 محبت زندہ رکھتی ہے

محبت ایک جذبہ ہے

لطافت سے گُندھا، پاکیزہ تر

اک جذبۂ خالص

کہ ہے جس کے رگ و پے میں

صداقت، حوصلہ مندی

وفا، اخلاص، بے لوثی

محبت ایسا پودا ہے

ذرا سی جو نمو پا کر

زمینِ دل پہ اُگتا ہے

محبت زندگی بھی ہے

کسی بھی عہد میں لیکن

محبت کرنے والوں کو 

کوئی جینے نہیں دیتا

محبت آزمائش ہے

کبھی کچے گھڑے پر 

یہ کسی کو آزماتی ہے

کبھی دیتی ہے دعوت 

آگ میں یہ کود جانے کی

محبت ایسی طاقت ہے

کہ جس کے بل پہ 

شش ماہے سرِ ناوک چلے آئیں

سرِ نیزہ سجے سر سے صدائے بندگی آئے

محبت مرتضیؑ کو وارثِ لولاک کرتی ہے

محبت مصطفیﷺ کو صاحبِ معراج کرتی ہے

محبت ایسا ورثہ ہے 

جسے ہم وارثانِ عشق ہی بہتر سمجھتے ہیں

محبت زندہ رہتی ہے

محبت زندہ رکھتی ہے

تزئین راز