آخری دن کی تلاش
(Judgement Day)
خدا نے قرآن میں کہا ہے
کہ لوگو! میں نے
تمہاری خاطر
فلک بنایا
چاند سورج سے جگمگایا
کہ لوگو! میں نے
تمہاری خاطر
زمیں بنائی
زمیں کے سینے پہ
ندیوں کی لکیریں کھینچیں
سمندروں کو
زمیں کی آغوش میں بٹھایا
پہاڑ رکھے
درخت اگاۓ
درخت پہ پھول پھل اگاۓ
کہ لوگو! میں نے
تمہاری خاطر
وہ دن بنایا
کہ دن میں کچھ کام کر سکو تم
کہ لوگو! میں نے
تمہاری خاطر
یہ شب بنائی
کہ شب میں آرام کر سکو تم
کہ لوگو! میں نے
تمہاری خاطر
یہ سب بنایا
مگر نہ بھولو
کہ ایک دن میں
یہ ساری چیزیں سمیٹ لوں گا
خدا نے جو کچھ کہا ہے
سچ ہے
مگر یہ نہ جانے
وہ دن کہاں ہے
کہ جب خدا یہ تمام چیزیں سمیٹ لے گا
مجھے اسی دن کی جستجو ہے
کہ اب یہ چیزیں
بہت پرانی
بہت ہی فرسودہ ہو چکی ہیں
محمد علوی
No comments:
Post a Comment