جو سامنا بھی کبھی یار خوبرو سے ہوا

جو سامنا بھی کبھی یارِ خوبرو سے ہوا

زمانے بھر کا یرش مجھ پہ چار سُو سے ہوا

کہا اشاروں سے میں نے کہ تم پہ مرتا ہوں

جو نطق بند مِرا، ان کی گفتگو سے ہوا

کسی کو بھی نہ ہوس تھی حلال ہونے کی

رواجِ شوقِ شہادت مِرے گلو سے ہوا

جدھر نگاہ کی،۔ جلوہ تِرا نظر آیا

کمالِ کشف مجھے تیری آرزو سے ہوا

عجب گھڑی تھی گریباں پھٹا تھا مجنوں کا

تمام عمر نہ واقف کبھی رفو سے ہوا

حلال ہونے کو صیاد سے محبت کی

قضا جو آئی تو مانوس میں عدو سے ہوا

خدائی کرنے لگا یار بے نیازی سے

بڑا غرور اسے میری آرزو سے ہوا

لگاتے ہیں جو سب آنکھوں سے آبِ زمزم کو

شرف یہ فیض کا چشمہ مری وضو سے ہوا

آغا حجو شرف